မိသားစုဝင်တစ်ယောက်ရဲ့ စကားတွေက သင့်စိတ်ကို အဆိပ်အတောက်ဖြစ်နေစေပြီလား?
မိသားစုဝင်တွေရဲ့ အပြုအမူကြောင့် စိတ်ဒဏ်ရာရပြီး ပင်ပန်းနေပါသလား။ ချစ်ခြင်းမေတ္တာကို မထိခိုက်စေဘဲ ကိုယ့်စိတ်ရဲ့ ငြိမ်းချမ်းမှုကို ကာကွယ်ဖို့ နယ်နိမိတ်တွေ ဘယ်လိုသတ်မှတ်ရမလဲဆိုတာ လေ့လာလိုက်ပါ။
မိသားစုဆိုတာ ကျွန်တော်တို့အတွက် အားအကိုးရဆုံး၊ အလုံခြုံဆုံးနေရာတစ်ခု ဖြစ်သင့်ပါတယ်။ ဒါပေမဲ့ တစ်ခါတလေမှာတော့ ကျွန်တော်တို့ကို အချစ်ဆုံးဆိုတဲ့ မိသားစုဝင်တွေရဲ့ စကားလုံးတွေ၊ အပြုအမူတွေကပဲ ကျွန်တော်တို့ရဲ့စိတ်ကို အပင်ပန်းရဆုံး ဖြစ်စေတတ်ပါတယ်။ “စေတနာနဲ့ ပြောတာပါ” ဆိုတဲ့ ခေါင်းစဉ်အောက်ကနေ ထွက်ပေါ်လာတဲ့ နှိုင်းယှဉ်မှုတွေ၊ အပြစ်တင်မှုတွေ၊ ထိန်းချုပ်လွန်းတဲ့ ဆုံးဖြတ်ချက်တွေက ကြာလာတဲ့အခါ ကိုယ့်ကိုယ်ကို ယုံကြည်မှုတွေကို တဖြည်းဖြည်း တိုက်စားသွားစေပါတယ်။
ဒီအခြေအနေက သိပ်ကိုသိမ်မွေ့ပြီး ကိုင်တွယ်ရခက်ပါတယ်။ ဘာကြောင့်လဲဆိုတော့ သူစိမ်းတစ်ယောက်ကိုတော့ ကျွန်တော်တို့ လွယ်လွယ်ကူကူဘေးဖယ်ထားနိုင်ပေမယ့် ကိုယ့်အသွေးအသားအရင်းအချာကိုတော့ အဲ့ဒီလိုလုပ်ဖို့ ခက်ခဲလို့ပါပဲ။ ဒီနေ့မှာတော့ အဲ့ဒီလို အကျပ်အတည်းဖြစ်နေသူတွေအတွက် ချစ်ခြင်းမေတ္တာကို အခြေခံပြီး ကိုယ့်စိတ်ရဲ့ငြိမ်းချမ်းမှုကို ဘယ်လိုပြန်လည်တည်ဆောက်မလဲဆိုတာ မျှဝေပေးချင်ပါတယ်။
၁။ လူကိုမဟုတ်ဘဲ၊ အပြုအမူကို အဓိကမြင်အောင်ကြည့်ပါ
သင့်ကို စိတ်ပင်ပန်းစေတာ သင့်အမေ၊ သင့်အဖေ ဒါမှမဟုတ် သင့်မောင်နှမတစ်ယောက်လုံး မဟုတ်ပါဘူး။ သူတို့ရဲ့ “အပြုအမူတစ်ခု” သာဖြစ်တယ်ဆိုတာကို အရင်ဆုံးခွဲခြားမြင်တတ်ဖို့ အရေးကြီးပါတယ်။ ဥပမာ – သင့်အမေက လူကောင်းတစ်ယောက်ဖြစ်ပေမယ့်၊ သူတပါးနဲ့ အမြဲနှိုင်းယှဉ်ပြီးပြောတတ်တဲ့ “အကျင့်” က သင့်ကိုနာကျင်စေတာပါ။ ဒီလိုမြင်လိုက်ခြင်းအားဖြင့် အမုန်းတရားအစား ဖြေရှင်းဖို့နည်းလမ်းကို စရှာနိုင်ပါလိမ့်မယ်။
၂။ သူတစ်ပါးကို ပြောင်းလဲလို့မရဘူးဆိုတာ လက်ခံပါ
ကျွန်တော်တို့ရဲ့ အကြီးမားဆုံး မှားယွင်းမှုကတော့ ကိုယ့်ကိုနာကျင်စေတဲ့သူကို ကိုယ်ဖြစ်စေချင်သလို ပြောင်းလဲဖို့ ကြိုးစားခြင်းပါပဲ။ လူတစ်ယောက်ရဲ့ နှစ်ပေါင်းများစွာအမြစ်တွယ်နေတဲ့ အကျင့်ကို ပြောင်းလဲဖို့ဆိုတာ မဖြစ်နိုင်သလောက်ပါပဲ။ ဒါပေမဲ့ သင်ပြောင်းလဲလို့ရတာတစ်ခုတော့ရှိပါတယ်။ အဲ့ဒါကတော့ အဲ့ဒီအပြုအမူအပေါ်မှာ သင်ဘယ်လိုတုံ့ပြန်မလဲဆိုတဲ့ သင့်ရဲ့ “တုံ့ပြန်မှု” ပါပဲ။
၃။ သေးငယ်ပြီး တိကျတဲ့ နယ်နိမိတ်တွေ စတင်သတ်မှတ်ပါ
နယ်နိမိတ်သတ်မှတ်တယ်ဆိုတာ စည်းခြားလိုက်တာ၊ ရန်ဖြစ်လိုက်တာမဟုတ်ပါဘူး။ “ဒီနေရာကတော့ ကျွန်တော့်/ကျွန်မရဲ့ ကိုယ်ပိုင်နေရာလေးပါ၊ ကျေးဇူးပြုပြီး လေးစားပေးပါ” လို့ ယဉ်ယဉ်ကျေးကျေး အသိပေးခြင်းတစ်မျိုးပါပဲ။
- ဥပမာ – သင့်ရဲ့ဝတ်စားပုံကို ဝေဖန်တဲ့အခါ “အမေ/အဖေရဲ့ စေတနာကို နားလည်ပါတယ်၊ ဒါပေမဲ့ သား/သမီး ဒီလိုဝတ်ရတာကို သဘောကျလို့ပါ” လို့ ပြန်ပြောကြည့်ပါ။
- သင့်ရဲ့ကိုယ်ရေးကိုယ်တာကိစ္စကို အတင်းမေးတဲ့အခါ “ဒီအကြောင်းကိုတော့ သား/သမီး အဆင်သင့်ဖြစ်တဲ့အခါ ပြောပြပါ့မယ်နော်” လို့ ပြောဆိုတောင်းဆိုကြည့်ပါ။
၄။ စိတ်ပိုင်းဆိုင်ရာ အကွာအဝေးတစ်ခု ဖန်တီးပါ
စကားတွေက အတိုင်းအလွန်ဖြစ်လာပြီဆိုရင် အဲ့ဒီနေရာကနေ ခေတ္တခဏ ထွက်ခွာလိုက်ပါ။ “သား/သမီး ခဏအပြင်ထွက်လိုက်ဦးမယ်” ဆိုပြီး လမ်းထွက်လျှောက်တာမျိုး၊ ဖုန်းပြောနေရင်းဆိုရင်လည်း “ဖုန်းအရင်ချလိုက်တော့မယ်နော်” ဆိုပြီး ပြောဆိုအဆက်ဖြတ်တာမျိုးက သင့်စိတ်ကို ကာကွယ်ဖို့အတွက် အရေးကြီးတဲ့နည်းလမ်းတစ်ခုပါ။
သင့်စိတ်ရဲ့ငြိမ်းချမ်းရေးကို ကာကွယ်ခြင်းဟာ တစ်ကိုယ်ကောင်းဆန်ခြင်းမဟုတ်ပါဘူး။ ကိုယ့်ကိုယ်ကိုယ် တန်ဖိုးထားခြင်းဖြစ်ပါတယ်။ သင်စိတ်ပိုင်းဆိုင်ရာ ကျန်းမာမှ သင့်မိသားစုကိုလည်း သင်ပြန်လည်စောင့်ရှောက်နိုင်မှာဖြစ်တယ်ဆိုတာကို အမြဲသတိရပါ။
